hagrass
اهلا بك في منتدي,وليد هجرس يرجي التسجيل

hagrass

www.hagrass.dahek.net
 
الرئيسيةالمجلهاليوميةمكتبة الصورس .و .جبحـثالأعضاءالمجموعاتالتسجيلدخول
اسماء الله الحسني
بحـث
 
 

نتائج البحث
 
Rechercher بحث متقدم

شاطر | 
 

 ملفات خاصة

اذهب الى الأسفل 
كاتب الموضوعرسالة
wilson_2010



عدد المساهمات : 19
نقاط : 66
السٌّمعَة : 0
تاريخ التسجيل : 09/08/2010

مُساهمةموضوع: ملفات خاصة   الأحد أغسطس 15, 2010 5:36 am

تقديم: عبداللطيف المناوى
تاريخ الحلقة: 02/08/2010
الضيوف: السيد/جمال مبارك امين لجنة السياسات
عبد اللطيف المناوي: السيدات والسادة من معهد اعداد القادة بحلوان جرت وقائع هذه الندوة
طالب1: في بعض الناس خدوا الشركات واشتغلوا كويس قوي اول ما اشتروا الشركات دلوقت العمال دول حقوقهم فين الاعتصامات اللي بتحصل ......
عبد اللطيف المناوي: هذا التطوراللي حصل في التعامل مع قضية الخصخصة وادارة اصول الدولة الى أي مدى متحقق الهدف منها اتفضل؟
احمد السيد حلمي/ جامعة المنصورة : انا شايف ان فيه فجوة فكرية بين الشباب والحكومة انا نفسي مجلس الشعب مثلا طالما فيه فئات وعمال ليه ما يكونش مقعد الشباب موجود احنا اللي هنكون اكثرتعبيرا لان احنا اللي عايشين المشكلة واحنا اللي نقدرنحلها وفيه اقتراح برضه بالنسبة لمشكلة البطالة ومشكلة التصحرفي مصرلوقسمنا الصحاري المصرية على الجامعات المصرية كحق انتفاع بحيث ان كل كلية مثلا الطب تعمل مجمع صحي كلية الهندسة تعمل مصنع صغير يبقى احنا عملنا الصحرا دي كمنطقة جاذبة لسكان فاحنا كنا نبقى قدرنا نتغلب على مشكلة البطالة
طالب3: بالنسبة للازمة المالية العالمية امريكا اول واحدة اشتكت منها فاحنا ازاي العقول اللي عندنا ومش عارفين نحل المشاكل اللي عندنا؟
عبد اللطيف المناوي: يعني احنا بنقول ان احنا استطعنا وتجاوزنا الازمة المالية العالمية هل هذا الاستيعاب ناتج عن حالة اقتصادية مختلفة لمصر في مرحلة من المراحل اولانه حاجة مش موجودة في الاقتصاد العالمي ليه امتصينا هذه الازمة وتجاوزناها وعلى أي اساس ؟
شيرين سعيد متولي/ كلية التربية جامعة بورسعيد: في القطاع الحكومي الشباب ما بيلاقوش تعيينات كله عقود مؤقتة وبيتلككوا لهم على أي حاجة بالنسبة للقطاع الخاص حتى لو معاه شهادات بيروح وبيقوله انا عاوزشهادة خبرة 5 سنين وهولسه بيبقى متخرج يعمل ايه؟
عبد اللطيف/كلية التجارة جامعة بنها: هل ادت تجربة الحزب الوطني في وزارة رجال الاعمال الاهداف المرجوة منها وهل يعد ذلك مخاطرة سياسية لان التزاوج بين المال والسلطة يؤدي في اغلب الاحيان الى الفساد ؟
محمد كامل/كلية تجارة بني سويف: هتكلم على ارتفاع الاسعار هوليه الحكومة بتحدد لكل موظف مثلا على المرتب الاساسي 7% او10% لان كده اللي بياخد مرتبات زيادة يعني فيه ناس بتاخد 5 الاف جنيه وناس بتاخد 70 جنيه او80 جنيه فال10% الي بياخدوها مفيهاش مشكلة ال5 الاف بتزيد وال70 جنيه هي هي مازادتش
جمال مبارك: اقتراحك ايه يعني انت شايف ايه ؟
محمد كامل: انا شايف ان اللي بياخد مرتبات صغيرة تزيد
رامي جمال/ كلية طب بشري جامعة السويس: انا رايي ان الحزب الوطني المصداقية بتاعته مع الشعب تزيد شوية لان فيه حالة عناد بين الناس والحكومة خلت فيه تيارات تانية تاخد وزنها مش المفروض انها تاخد الوزن دا يعني هي مش بالقوة دي ولكن هي خدت وزنها لمجرد حالة عناد فحضرتك كامنين لجنة السياسيات في الحزب الوطني وكشاب بيعمل في المطبخ السياسي منذ سنوات ازاي بترى مستقبل مصرهل بتجد انه يبقى فيه شارع نظيف وانسان له كرامة اكتروهل احنا كشباب في المستوى السني دا هنلحق بالخير بتاع التغيير دا ولا لا
جمال مبارك: انت عندك كام سنة؟
رامي جمال : 20 سنة
جمال مبارك : لا لسه بدري هتلحق
بلال السيدمحمد/ كلية الطب جامعة الازهر: المشكلة ان الشباب لما بيتخرجوا بيبقوا عايزين يفتحوا بيت ويتجاوزوا مشكلة السكن مشكلة مستعصية الشقق بقت غالية جدا وما بقتش موجودة اصلا فعايز اعرف من حضرتك ايه تصورك في المستقبل لحل المشكلة دي ؟
هندعادل/ كلية الاداب قسم اعلام: احنا دلوقت بنبني مدن وعمارات ومساكن في 6 اكتوبر والعاشرمن رمضان وبنينا مصانع كتيرجدا والمصانع دي طالبة عمال كتير جدا ان هما يروحوا يشتغلوا هناك بس للاسف تلت اربع الشعب مش عايز يروح هناك ايه السبب في ان الشباب مش عايزين يروحوا ويشتغلوا في المناطق دي؟
جمال ميارك: ماهو انا عايز اسالك ؟
هندعادل: يمكن عشان مناطق بعيدة نائية تحس انها مهجورة شوية مفيش فيها حياة زي ما تكون في المدينة عندنا الشاب بيفضل يعيش في منطقة جنب بلده ومنطقة سكنية وفيها مرافق
عبد اللطيف المناوي: واسمح لي برضه اني اضيف سؤال فكرة ان الدولة ودا احد التصورات المهمة انه في مرحلة من المراحل كان الحديث عن الفقراحد الممنوعات خليني اسميها النهارده الدولة النهارده الحزب اعترف بالفقروفيه جدل حوالين الفقرايه هوالفقرواحنا فين من هذه المسالة وايه خطتكم للتعامل مع هذه المسالة شكرا لكم؟
جمال مبارك: اول ما نقول خصخصة فيه ناس بيبدر لذهنها حاجات سلبية هو شايف القطاع الخاص ولكن القطاع الخاص من وجهة نظره مرتبط بفساد مرتبط باستغلال مرتبط باحتكار الخصخصة مرتبطة ان المشروعات دي اتباعت رخيصة لناس معينة مرتبطة بعمال زي ماالاخ قال عمال انضروا ..الواقع النهارده بيقول ايه بيقول ان 70% من قوة مصر في قطاع خاص يعني احنا 23 مليون تقريبا 70% من دول بيعملوا في القطاع الخاص اللي عندنا في الحكومة وفي الحزب هوالاعتماد على القطاع الخاص لخلق فرص العمل والاستثمارات ولمين تحتفظ الحكومة ببعض المصانع اوبعض المؤسسات الهامة الحيوية اللي لازم الحكومة تكون متواجدة فيها لاسباب سواء كانت لاسباب استراتيجية او سياسية اخرى لكن الواقع بيقول ان ال5 سنين اللي جابة انتوا شباب هتطلعوا سوق العمل بعد سنتين انا بقولكم ان 90% من الشباب النهارده فرصة في القطاع الخاص ، لما بدانا عملية الاصلاح من 7 او 8 سنين عنصر حاكم انه مفتحناش الاقتصاد المصري للمنافسة بمعنى ابدأ بالتدريج واخفض الجمارك على بعض المنتجات اللي بتيجي من بره ابدأ بالتدريج واعمل اتفاقات تجارة حرة مع دول كبيرة زي اوربا ودا معناه بشيل الحواجزبفتح لنفسي اسواق بره كان دائما التخوف عندنا ان الشركات هتفلس والعمالة هتتضررعشان كده فكرة التدرج و كل الاتفاقات بتقعد10 سنين عشان تتدرج لكن كان العنصرالدافع لدا مش هنقعد ننمي قطاع السياحة قطاع الاتصالات قطاع تكنولويجا المعلومات الا اذا واجه منافسة ومنافسة عالمية النهارده مش هنقدرنفكرفي مصربس أي واحد بيبدا مشروع اذا اخد في اعتبارفي المنطقة الي حواليه اوالدول اللي عندنا معاها اتفاقات تجارة حرة عشان يقدر, مالسياحة خدمة- السياحة تصدير هتجدوا السياحة في الخدمات في الزراعة في الصناعة كل المنتجين اللي بيعتمدوا بشكل او باخر على تصديرمنتجهم للخارج هتلاقي ادائهم افضل تكلفتهم اقل وكفائتهم اعلى ليه لانه لازم ينافس زميله اللي بينتج نفس المنتج اوبيقدم نفس الخدمة في اوربا اوفي اسيا دا معناه ان القطاع الخاص المصري قادرانه يخترق الاسواق الخارجية وقادرانه يبقى عنده درجة عالية من الكفاءة بس لازم نأهله المناخ دا اللي ال5 سنين اللي فاتوا كان التحدي بتاعنا ازاي أقدرأحقق ثقة جديدة للقطاع الخاص المصري انه يقدريستثمر هنا ويصدرللخارج ويتنافس في الخارج تيجوا لقانون الضرايب وتخفيض الجمارك وتسهيل الاستثمار ومن الاستثمارات الضخمة في البنية الاساسية من طرق لغازطبيعي لطاقة كهربا عشان هذه المصانع تقدرانها تنمو وتقدرانها تكبردا جاب نتيجة صادراتنا اتضاعفت في ال5 سنين اللي فاتوا تفتكروا الريس من 7 سنين قال الصادرات حياة اوموت مفيش دولة في العصراللي احنا عايشين فيه قدرت انها تنطلق وتضاعف من معدلات الامن القومي بتاعها وقفلت على نفسها واعتمدت على السوق المحلي احنا كانت نسبة صادراتنا لانتاجنا نسبة ضئيلة للغاية في ال5 سنين اللي فاتوا الصادرات المصرية لخارج تم مضاعفتها يعني دا مصنع مصري في 6 اكتوبر في العاشر من رمضان في بعض المناطق الزراعية في الصعيد، مزراع مصري زراعة حديثة بيصدرخضروات وبيصدرانتاجه لاوربا وبينافس وانتاجه بيبقى بعد 4 او 5 ايام في محلات التجزئة في اوروبا اجهزة منزلية حديد تكييف اسمنت لما بيدخل القطاع الخاص بيحصل فساد او بيسعى البعض انه يتحايل عشان ياخد تسهيلات ولازم نتعامل معاه والاجهزة الرقابية عندنا بتتعامل مع الكلام دا والاعلام بيكشف وانتوا بتتكلموا وفي النهاية القضاء بيحسم فالشباب متضايق ومتذمر اه عشان توجهنا كان ولا يزال ازاي افتح الباب واديله فرصة, اكتر حاجة لما يتخرج الشباب ويصاب باحباط لانه بيبقى عنده امال مش عارف يشتغل او مش عارف يبدأ حياته الجديدة وانا بقولكم انتوا الفرص قدامكم اكترمن الاجيال اللي سبقتكم لكن انا بتكلم على المستوى الرسمي ازاي نمهد ان احنا نستمرفي فتح هذه القطاعات قدامكم بالنسبة للتوظيف في القطاع الحكومة والخاص انسوا الحكومة, نصيحة مني انسوا التعيين في وظيفة في الحكومة حتى لو جت لك الفرصة فكر فيها 10 مرات مش هتحقق لك طموحك واذا اضريت خدها كعملية مرحلية بيخافوا من القطاع الخاص لانه فيه بعض الشركات وهذا حقيقي فيه بعض منهم بيتحايل على القانون وبالتالي بيخلي الناس بيخلوهم يمضوا على استقالات ودا اللي احنا بنواجهه واذا اضطرينا هندخل تغييرات على قانون العمل عشان يبقى فيه حماية وايضا مرونة هنفكر فيها دا المستقبل نصيحتي خدوها او ارفضوها من تجاربي في السنتين اللي فاتت دا المستقبل في الفترة اللي جاية ....
فكرة حكومة رجال الاعمال دا مصطلح المعارضة نجحت ليني اقر برضه انها تحط هذا العنوان ميش حاجة اسمها حكومة رجال اعمال اشمعنى ماقالوش من من فترة حكومة اساتذة جامعة والكلام اتحط من اليوم الاول هوالسؤال هنا عايزين قيادات على قدرعالي من الكفاءة ولا لأ هل عايزين قيادات قادرة تعامل مع طموحكم وطموحات المجتمع هل عايزين قيادات فاهمة اللي بيحصل في العالم وقادرة انها تتجاوب مع العالم ولا دا السؤال اللي لازم تساله أولا احنا عندنا من القوانين ومن الاجهزة الرقابية اللي بيكشف الكلام دا كله أي وزيرممكن يتحاكم طبقا للقانون العادي أي مسئول في أي هيئة ممكن يتحاكم طبقا للقانون العادي لكن حاسبوا الحكومة وانا بتكلم على الجانب الاقتصادي على اللي انجزفي ال5 سنين اللي فاتوا هو دا السؤال ودا يوديني لسؤال الاخ الي سال عن الازمة المالية وعلاقتنا بالازمة،الازمة فعلا بدات في امريكا احنا كنا بننمو من 7 ل8% نزلنا ل4 وشوية الحمد لله دلوقت بدانا في التصاعد مرة اخرى واحد يقولي طب احنا ما تاقثرناش ليه ..اولا ما تاثرناش لان احنا جزء من برنامج الاصلاح في ال5 سنبن اللي فاتوا كان هدفه اني احسن الوظايف والدخل لكن هدفه اني اؤهل الاقتصاد المصري للدخول في النمنافسية احنا فشلنا في التسعينات نتعامل مع أى ازمة مماثلة ودخلنا مرحلة الركود عام 2000 و2001 وخرجنا منها عام 2004 و2005 حجم الازمة لم يكن لها مثيل منذعام 30 كان ممكن بدون الاصلاحات اللي عملناها كان ممكن الاقتصاد المصري ان ينهار كان ممكن القطاع المصرفي ان ينهار كان ممكن معدل البطالة ال10% وكان الممكن الحكومة تقلل من النفاق العام في موازنة الدولة ليه كده لان الدول اللي خبطتها الازمة بشكل كبير بتعمل دا النهارده اوربا وامريكا وبعض الدول الاخرى تخفيض في المرتبات تخفيض في الانفاق العام تسريح العمالة من الشركات الخاصة ، اتاثرنا بلا شك معدلات فرص العمل انخفضت معدلات الاستثمارات انخفضت صادراتنا اتأثرت احنا جزء من العالم ولازم نكون جزء من العالم..سمعنا اصوات شفتوا العالم النهارده بيأمم دا العالم بيقفل أسواقة دا العالم بيقفل التجارة مرة اخرى احنا كنا ماشيين في الاتجاة دا وطلعت في ااحد الاحاديث وقلت ارجو من الناس اللي بيحللوا ما يقروش بعض الاحداث قراءة خاطئة بيدوا الانطباع عن المجتمع امصري ان احنا في اتجاة الخطأ وان العالم كله رجع في هذا الطريق فاحنا فعلا نجحنا كمجتمع في اجتياز هذه الازمة وال5 سنين اللي جاية لازم نتفق على هدف لو عايزين نضاعف الاجمالي القومي بتاعنا لازم ننموعلى الاقل بما لا يقل عن 8% .....
عبد اللطيف المناوي: ننتقل لموضوع اكثر حرارة وهو الموضوع السياسي مصر داخلة على عام انتخابي مهم على انتخابات برلمانية بعد عدة اشهر وانتخابات رئاسية بعد حوالي عام وعدة اشهرايه معاييراختيار النواب اين الشباب من الاختيارات ايه الدروس المستفادة سواء من البرلمان السابق او من انتخابات الشورى الاخيرة ايه طبيعة العلاقة مع القوى السياسية المختلفة اتفضل
احمدنوح/ طب قصر العيني : كيف سيدعم الحزب الوطني تواجد الشباب في البرلمان احنا دلوقت شفنا كتل للمراة و في الحزب الوطني ياترى في المستقبل ممكن نشوف كتل للشباب في قلب البرلمان ولا لأ؟
محمد محمد/ كلية التربية جامعة الزقازيق : هل وجود اصلاح سياسي دا معناه انه كان فيه فساد موجود الحاجة التانية هل الاصلاح دا هيكون تالمن الحكومات نفسها ان انا اغيرها ولا من الشباب وما دور حضرتك كأمين للسياسيات فيي الحزب الوطني في تنمية الوعي السياسي لدى الشباب وزيادة المشاركة و السياسية اللي تقريبا مفتقدة
محمد امبابي/جامعة سوهاج: في انتخابات مجلس الشورى اللي فاتت حصل فيها تجاوزات كتيرة ايه اللي حصل بالظبط والحق على مين يعني الناحية التانية اذن فيه ناس كتير بتتستر وراء الحزب الوطني واحد بيجمع امواله بطريقة قذرة وبيجي في الاخر يتسترفي الحزب الوطني وفي يوم من الايام بينزل مرشح لحزب وفي الغالب بيفوز ودا اللي خلى الناس فقدت ثقتها في الحزب الوطني
عبداللطيف المناوي: هنا معاييرالاختيار في المرحلة القادمة
جمال حاتم/ جامعة الازهر: المشكلة ان الجلسة الماضية الدولة شهدت تجاوزات وسوء اخلاق من اعضاء مجلس الشعب ورفع الحذاء يعني منتهى البذاءة ما تطلعش من اقل طبقات المجتمع الاقتراح انزال كل مرشح لبرنامج انتخابي هذا البرنامج الانتخابي يعرض على لجنة السياسيات لمطابقة هذا البرنامج الانتخابي لاحتياجات الدايرة بتاعته وبعد ذك يتم محاسبته على هذا البرنامج
احمد عبد المجيد/ كلية الحقوق جامعة المنصورة : في انتخابات الجامعة قائد الحرس هو اللي بيختار مش احنا اللي بنختار والطلاب الاخوان يرشحوا نفسهم والقائد يقوم مانع اساميهم نطلع بعد كده انتخابات الشورى واللي حصل فيها تزويرعندنا في المنصورة واعضاء الحزب الوطني خدوها باكتساح وبعد كده انتخابات مجلس الشعب هتبقى طبعا موت وبعد كده انتخابات الرئاسة اللي ممكن يحصل فيها توريث في الحكم وبعد كده بتكلم عن الفساد اللي بيحصل اللي حضرتك رحت قرية دماص في الدقهلية البيت اللي انت دخلته راصفين اول الطريق لغاية البيت دا البيت دا الوحيد اللي دخله غاز طبيعي وعملوا حمام سباحة في القرية وبعد حضرتك ما مشيت عملوا .....
جمال مبارك: شالوا حمام السباحة ولا ايه؟
احمد عبد المجيد: اتشفطت المية منه واتقفل والنخل اتشال وعندنا في المنصورة جه المحافظ في مستشفى التامين شال الزرع اللي قدمها ورصف الطريق وفيه طريق تاني محتاج رصف طريق سندوب وبرضه الفساد بتاعه الوزرا ليه وزير يروح يتعالج على نفقة الدولة
عبد اللطيف المناوي: هناخد بعض الردود من الاستاذ جمال على ماطرح وهنرجع لكم ايضا لافي موضوع السياسة
جمال مبارك: نبدا بالانتخابات احنا في 2005 ادخلت تعديلات كثيرة احنا محتاجين نفعل الضوابط اللي موجودة عشان نتعاون مع هذه المشاكل بس زي ما الاخ اللي من سوهاج قال مش عارف عندكم الوضع في المنصورة مختلف ولا لا فيه جزء من المشاكل من المرشحين انفسهم وللاسف فيه بعض الممارسات من مرشحين للحزب الوطني وفيه من مستقلين وفيه من احزاب اخرى بتحصل ممارسات بتحصل بلطجة وبالتالي بتخلي الناس مش عايزة تروح مين عايزيروح معركة مش انتخابات الانتخابات المفروض انك تروح بشكل منظم بتدلي بصوتك لم نصل بعد لسهولة سير العملية واتمنى من خلال الاستعداد لانتخابات مجلس الشعب انه يتم اجراء انتخابات بشكل افضل من كافة الجوانب بالنسبة للفساد مرة اخرى مفيش تهاون مع هذا الموضوع لدينا من الاجهزة يعني مثل نواب العلاج على نفقة الدولة دا اتهام موجود من ساعة ما اطلق ترسخ في ذهن الناس وفي النهاية اللي هيفصل الاجهزة اللي هتحقق انا النهارده قريت ان لم تثبت الى الان كل ما قدم من ادلة ولو كانوا اعضاء في الحزب الوطني هنتعامل معاهم لكن ما نقدرش نتعامل مع الناس بالشبهات لكن في العمل السياسي حتى لو طلع معملش حاجة من الجانب القانوني لك لو حد بتحوم عليه شبهات معينة او سمعته مش مظبوطة دا هيدخلنا في انه مش من مصلحتنا ان ندفع بوجوه سمعتها مشبوهة على مستوى الدايرة ودا هيخلينا ندقق في مرشحينا في الانتخابات القادمة مرة تانية قضايا الفساد اللي تم التركيزعليها مسيطرة في كثيرمن التعليقات وانتم على حق بالنسبة لانتخابات انت حطيت شوية فرضيات في سؤالك انت اتكلمت على توريث ولا انتخابات ولا تعيين انا وضحت الموضوع دا اكثرمن مرة انا عندي مهمة محددة بيحكمها نظام سياسي انا في النهاية امانة السياسيات دورها انها تقترح ولكن فيه قيادات كثيرة داخل الحزب امانة السياسات بتقعد مع الشباب بتجهزاقتراحات بتطلع بعد كده ببرامج عديدة عشان تقرالبرنامج السياسي انا دوري واضح المساراللي انا خدته لم يكن بالنسبة لي القرارالاسهل لكن اديته وزقت واديته جهد ومستمرفي تحمل التحديات وتقبل النقد ولازم الواحد يعرف انه لما تخش في المجال العالمي لازم تتقبل النقد بصدررحب لانه في النهاية أي راي يحتمل الخطا اوالصواب وفي النهاية يا اما الناس تجتمع عليه اوتهاجمه اولا يوافق عليه ويمكن من كام بعض برامج الحزب لا تتفق معاك وهذا حقك وانا سعيد لان دي طبيعة المرحلة اللي بنمربيها مفيش حد بيعمل في العمل العام وهو منزه عن النقد ودي طبيعة المرحلة الجديدة النقطة الاخيرة انا ضميري مستريح في العمل الخيري لمساعدة الفئات الفقيرة اكتر من العمل الحزبي لما بناخد بايد الناس وخصوصا لما بفتح للشباب باب الامل انا هستمر سواء انا عارف في فترة ما هتيجي تقول سواء في عمل حزبي او بره العمل الحزبي عندي التصميم المهم اكون مقتنع باللي تعمله فاهم صعوباته وتتحمل وتعرف هتخطئ وهتهاجم وهتنتقد نجاحك هيبقى ازاي تستوعب دا ، دا بتشوفه في العمل السياسي لانها معركة وضرب بالنار دا العمل السياسي اتهامات وهجوم وحملات اعلامية اذا كنت مش قادر تعمل معاه سيبه لحد تاني دا القراراللي انا خدته في ال7 سنين لاني حسيت انه لوانتهى العمل الحزبي انا مش نادم لاني قدمت حاجة اسهمت بحاجة كثيرمن الشباب دخلوا لاحداث حركة داخل المجتمع التوجه العام هو توجه صح لمستقبلنا من حقي ادافع عن وجهة نظري وان يكون عندي الشجاعة للنقد الذاتي لان في النهاية احنا مش شركة خاصة احنا حزب عام انتخابات الرياسة ليها وقتها ليها قواعدها ليها الدستور والاحزاب والحركة الموجودة الاسئلة دي مكانتش مطروحة من 8 سنين لكن الدستورخلى الاحزاب تعدي,الاحزاب محتاجة عضو واحد في البرلمان يبقى ليه حق انه يرشح احد قياداته في الانتخابات القادمة الانتخبات القادمة هيحصل شد وجذب فيها ومزايدات لازم نتحمل دا لان هي دي طبيعة المرحلة
عبد اللطيف المناوي: هنتكلم عن الوضع في السياسية الخارجية لموضوع الفلسطينين وحوض النيل وعلاقاتنا العربية-العربية والسؤال الاكثر حضورا هو دورمصر هل مصر في حضور في تراجع دور مصر القومي والاقليمي؟
محمد يحي/اتحاد طلاب جامعة الازهر: السياسيةالخارجية بنسمع عن دورمصرالاقليمى فيه ادوغار برزت زي الدورالتركي والايراني انا مش عايز ابالغ لكن خلينا نعترف ان دورمصر تراجع اقليميا ودخلنا في صراعات مع دول مش زينا مكانتها اكبرمنها وكمان ملف الخارجية المصرية احنا لقينا كذا ازمة حدثت بنلحق منها الكارثة بعد ما تحصل زي ملف دول حوض النيل ليه استنينا لحد ما الازمة وصلت لكده ليه مكانش لينا شراكات اقتصادية معه الدول دي ؟
نيفين مسعود/ كلية التربية النوعية: مشكلة الميه احنا سمعنا انهم بنوا سدود والحكومة بتقول انه مفيش مشكلة بالنسبة لانتخابات الشورى المسئولين عن النظام في الانتخابات بيساعدوا على التزوير والمراقبين هما اللي بيزوروا ؟
محمد عبد الرحمن/ جامعة المنصورة : موضع معبررفح فجأة لقيين الدنيا ضربت جون في مصر طب هنعمل ايه عشان امننا القومي عايزين نبين للناس وجهة النظردي ؟
عبد اللطيف المناوي: انا بطلب من الاستاذ جمال ان يعطي ردوده عن كل ما طرح جمال مبارك السؤال الاوسع التراجع انا مقدر لكل اللي بتسمعوه هو دورمصر في مرحلة الستينات مصر كان ليها دورودائما المرجعية كان هذا الدوروكانت الدول الافريقية بتكافح في ثورات التحرردي كانت مرحلة ومصردولة كبيرة عشان لما تروحوا في افريقيا لسة شايلة هذا الدوراحنا النهارده في زمن مختلف ولازم الدوريتطور ويبقى العنصر بتاعي مصالحي وانا بكلمكم بشكل يبدو اناني وخاصة في القضية الفلسطينية فاناعلاقتي بيها الفلسطينيين وعودة اراضيهم واستقرارهم عشان كده احنا من 48 لحد النهارده لمفاوضات العمل سياسي ومش هيهنأ لنا بال واستخدم قدراتي واتعامل مع الموضوع بس مش في المنطقة العالم بيتغير يعين فيه ناس بتقول ان امريكا هي القوى المهيمنة والمسيطرة هتظهر قوى تانية في اسيا زي الصين زي الهند ودا وارد لاي مدى يكون له تاثيرعلى مصالحنا لازم ابدا اؤهل نفسي خلينا نشوف افريقيا اولا الكلام انه مكانش بيحصل حاجة في ملف افريقا دا كلام غير صحيح وعشان تبقوا في الصورة الموضوع ليس كما يصوره الاعلام مفيش خلاف حادعلى الرؤية المشتركة بين مصر ودول حوض النيل وانتوا سمعتوا من الرئيس ان احنا هنبدا نعزز مشاريع العمل المشرك بينا اللي تحقق لنا مصلحتنا لكن ايضا هتساعد هذه الدول هنبدا بتواجدنا وعاقلاتنا بالمؤسات الدولية زي البنك الدولي ان احنا نساعد هذه الدول عشان تحصل على تمويل عشان هذه المشروعات المهمة لتنمية التخوف من ان السدود هتقلل من نسبة مصر في المياه الكلام دا مش علمي حصة مصرموجودة ومحفوظة فبي ال100 سنة اللي جاية اه حصل خلاف على بعض بنود الاتفاقية ولكن اعتقد في الفترة الجاية السودان هتصل معانا الى اتفاق بالنسبة لامريكا انا النهارده حصلت طفرة في صادراتي لامريكا اتاثرت بالازمة لكن فيه فرص عمل ليه ما اعملش علاقة معاها والدول كلها بتعمل كده حتى لواختلفت مع امريكا اوالسياسة الامريكية نرجع تاني للسياسة ازاي تديرالسياسيات حتى لوكانت مختلفة لكن توظف هذه العلاقات لخدمة المنطقة علاقاتنا مع امريكا قوية مع اختلافنا معاهم ال7 او ال8 سنين اللي فاتوا شهدت حروب وصدامات في المنطقة ولكن خلافاتنا كانت واضحة لكن عندنا علاقات متنامية مع روسيا وزيرالتجارة في امريكا الجنوبية والبرازيل عشان نمضي اتفاقات زي الاتحادالاوربي عشان مصر تنفذ لهذه الاسواق والصين وتجاراتنا في الفترة اللي فاتت تدرجت اوروبا النهارده تكتل كبير وصادراتنا في اوربا وفي نفس الوقت عندنا نقاط خلافية كتيرفي السياسة بيحاولوا يتدخلوا في الداخل وبتصدى لهم ازاي اوظف مواقفهم اوروبا واخده مواقف ايجابية في القضية الفلسطينية استغل دا وبعدين انتوا بتتكلموا عن الدور والدول الاخرى اللي بتحاول تلعب دورفي المنطقة هتلاقوا الدور التركي وعلى فكرة القضية الفلسطينية تهمنا اكترمن تركيا لان دا الامن القومي المصري أي دورتقدر تقوم به أي دولة لابد ان نرحب بيه اذا تركيا هي اللي تلعبه اذا فرنسا هي اللي تلعبه دا في الاخر بيحقق المصلحة ..نيجي للقضية الفلسطينية هتسمعوا تراجع الحوارالفلسطيني وانقسام داخلي مصر مهما فعلت لا يمكن هيحصل تسوية بدون دورمصري أي دورمكمل مرحب بيه الخناقة بين فتح وحماس فيه جهد بيحصل فيه حملة منظمة على مصرلازم نعرف ان مفيش قرار سياسي هيمش ورا حملة اعلامية ولكن هيمشي ورا مصلحة ..عشان كده التعامل بحذر ومعبررفح مش هوالحل الوحيد فيه معابركتيرة ما انتوا لو اتفقتوا المعابرهتتفتح كلها والفلسطينيين هيقعدوا ويتكلموا وهياخدوا حقوقهم العالم بينظرالى مصر كمركز استقرارالعالم بيثق في مصرلانها بتاخد مواقف في الظروف الصعبة انا مقتنع خلي دايما القلق عشان نحسب للمخطط اللي عايز يضرب مصالحنا بالذات في العالم المتغيرالسريع خلوا عندكم هذه الثقة
عبد اللطيف المناوي: انا بشكركم وبشكر السيد جمال مبارك وارجو ان نكون استمعنا منكم واستمعنا الى الاستاذ جمال ,استاذ جمال شكرا لك والى اللقاء
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
ملفات خاصة
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
hagrass :: قسم المنوعات :: قسم المنوعات-
انتقل الى: